గోండ్ కతిరా ఒక సహజ ప్రీబయోటిక్ - ఆరోగ్య నిపుణులు

వేసవి కాలంలో అధిక ఉష్ణోగ్రతల నుంచి ఉపశమనం పొందేందుకు సాధారణంగా ప్రజలు వివిధ రకాల శీతల పానీయాలను ఆశ్రయిస్తారు. అయితే కృత్రిమ పానీయాల కంటే సహజంగా శీతలతను అందించే గోండ్ కతిరా ఆరోగ్యానికి ఎంతో మేలు చేస్తుందని నిపుణులు చెబుతున్నారు. దీనిని ‘ట్రాగాకాంత్ గమ్’ అని కూడా పిలుస్తారు. వంటింటి మసాలా డబ్బాలో లభించే ఈ చిన్న పదార్థం జీర్ణ ఆరోగ్యానికి సహజ ఔషధంగా పనిచేస్తుందని పేర్కొంటున్నారు. ICMR, CBHI వంటి ఆరోగ్య సంస్థల నివేదికల ప్రకారం, ప్రస్తుతం సుమారు 80 శాతం మంది ప్రజలు అసిడిటీ, గుండెల్లో మంట వంటి జీర్ణ సమస్యలతో బాధపడుతున్నారు.

ఇలాంటి పరిస్థితుల్లో ఆస్ట్రాగలస్ మొక్క నుండి లభించే గోండ్ కతిరా ఒక వరంగా భావిస్తున్నారు. సింథటిక్ కూలింగ్ డ్రింక్స్ తాత్కాలిక ఉపశమనం మాత్రమే ఇస్తే, గోండ్ కతిరా ఒక సహజ ప్రీబయోటిక్‌గా పనిచేస్తుంది. ఇది జీర్ణాశయంలో మంచి బ్యాక్టీరియా పెరుగుదలకు సహాయపడుతూ పేగుల ఆరోగ్యాన్ని మెరుగుపరుస్తుంది మరియు రోగనిరోధక శక్తిని పెంచుతుంది. ఇందులో ఉండే కరిగే ఫైబర్ మలాన్ని మృదువుగా చేసి మలబద్ధకం సమస్యను తగ్గిస్తుంది. నీటిలో నానబెట్టినప్పుడు ఇది జెల్ రూపంలో మారి జీర్ణాశయ గోడలపై రక్షణ పొరలా ఏర్పడి యాసిడ్ రిఫ్లక్స్ మరియు గుండెల్లో మంటను తగ్గించడంలో సహాయపడుతుంది.

గోండ్ కతిరాలో అధిక ఫైబర్ ఉండటం వల్ల దీన్ని తీసుకున్నప్పుడు పొట్ట నిండిన భావన కలిగి అతిగా తినే అలవాటు తగ్గుతుంది, తద్వారా బరువు నియంత్రణకు సహాయపడుతుంది. అలాగే శరీరంలో నీటిని నిల్వ ఉంచే లక్షణం ఉండటంతో వేసవి అలసట, డీహైడ్రేషన్ తగ్గుతుంది. అయితే దీనిని వాడేటప్పుడు కొన్ని జాగ్రత్తలు అవసరం. ఎప్పుడూ ఎండిన రూపంలో కాకుండా కనీసం 8 గంటలు నీటిలో నానబెట్టి జెల్‌గా మారిన తర్వాతే ఉపయోగించాలి. దీనిని వాడేవారు రోజుకు 2–3 లీటర్ల నీరు తాగడం అవసరం. అలాగే ఏవైనా మందులు తీసుకుంటున్నవారు వాటి తర్వాత కనీసం 2 గంటల గ్యాప్‌తో మాత్రమే గోండ్ కతిరా తీసుకోవాలి. కృత్రిమ కూల్ డ్రింక్స్‌కు బదులుగా నిమ్మరసం లేదా పాలతో గోండ్ కతిరాను తీసుకోవడం ఆరోగ్యానికి మరింత మేలు చేస్తుందని నిపుణులు సూచిస్తున్నారు.

గమనిక : ఈ సమాచారం కేవలం అవగాహన కోసం మాత్రమే. ఇది వైద్య సలహా, నిర్ధారణ లేదా చికిత్సకు ప్రత్యామ్నాయం కాదు. ఏవైనా ఆరోగ్య సమస్యలు ఎదురైతే వెంటనే అర్హత కలిగిన వైద్యుడిని సంప్రదించండి.