ఫైర్‌ఫాక్స్‌లో భద్రతా లోపాలను గుర్తించిన ఏఐ

ఆంత్రోపిక్ సంస్థ రూపొందించిన ఆధునిక ఏఐ నమూనా క్లాడ్ ఓపస్ 4.6 మొజిల్లా ఫైర్‌ఫాక్స్ బ్రౌజర్‌లో అనేక భద్రతా లోపాలను గుర్తించింది. ఈ నమూనా సామర్థ్యాన్ని పరీక్షించేందుకు ఆ సంస్థ మొజిల్లాతో కలిసి పని చేసింది. కేవలం రెండు వారాల్లోనే మొత్తం 22 భద్రతా లోపాలను గుర్తించగా, అందులో 14 తీవ్రమైన ప్రమాదకర లోపాలుగా గుర్తించారు.

పరీక్షల కోసం పరిశోధకులు ముందుగా ఫైర్‌ఫాక్స్‌లో గతంలో నమోదైన భద్రతా లోపాల సమాచారంతో ఒక దత్తాంశాన్ని సిద్ధం చేశారు. ఆ తరువాత నమూనాకు బ్రౌజర్ తాజా సంచికలో కొత్త లోపాలను కనుగొనే బాధ్యత ఇచ్చారు. మొదటగా జావాస్క్రిప్ట్ యంత్రాంగాన్ని పరిశీలించగా, తరువాత బ్రౌజర్‌లోని ఇతర భాగాలపై కూడా విశ్లేషణ చేపట్టారు.

ఈ ప్రక్రియలో నమూనా దాదాపు ఆరు వేల సీ ప్లస్ ప్లస్ ఫైళ్లను పరిశీలించి మొత్తం 112 ప్రత్యేక నివేదికలను సమర్పించింది. పరిశోధకుల పరిశీలన తర్వాత అందులో 22 లోపాలు నిజమని నిర్ధారించి మొజిల్లాకు తెలియజేశారు. వీటిలో చాలా సమస్యలను ఫైర్‌ఫాక్స్ 148 నవీకరణలో సరిచేసి, మిగతావి రాబోయే నవీకరణల్లో పరిష్కరించనున్నట్లు తెలిపారు. ఈ ప్రయోగానికి సుమారు నాలుగు వేల డాలర్ల విలువైన అనువర్తన సేవల వినియోగాన్ని ఖర్చు చేసినట్లు సంస్థ వెల్లడించింది.